بستغرب

بستغرب وقت عيد ميلادها وعيد الام بجبلها هدايا أغلى من امي ووقت عيد ميلادي بتجبلي بس جاتو

بستغرب لصهرها بتجبله على عيد ميلاده وبتقول ما بيترك مناسبة ما بجبلي فيها طيب وانا شو؟؟ والله بجيب اكثر منه بكثير وأغلى كمان 😛

وهاي كمان عادي بتصير ...

بنتي علمتني درس

اليوم بنتي يلي عمرها سنتين علمتني درس بيسوى عمري..

زعلت منها وقلت لها ما بقى بدي احكي معك ضلت تحتال عليي بعدها وتتقرب مني  وتفتح ايديي حتى اعبطها وتقلي اضحكي ضحكة طيوبة حتى ضحكت وسامحتها وعبطتها..

 لو عنجد نحنا منضل  على باب الله ومنتحايل ومنغتنم كل الفرص ومنضل مُصِّرين الا ما رب العالمين يفتح لنا الباب

الله ارحم فينا من رحمتنا على ولادنا

صرلي ١٠ ايام

صار عمر جميل ١٠ ايام..

ولدت الثلاثاء ١١ اب كثير اتعذبت بالعملية والمستشفى زبالة..

ضهرت الجمعة ورجعت ع بيتي..

بيت عمي هالمرة كانوا غير اول مرة..

ديما كثير ساعدتني بالبنات، ومخففة عني حملهن.. 

حماتي صارت مرتين باعتتلي اكل اول مرة اوزي وشوربة والثانية صيادية..

ماما اجت لعندي مرتين ما عم تطول اكثر من ساعة لأنها مطووشة بالورشة..

وبيت حماي اجوا مرة، وانا مرقت لعندي حماتي مرة بعد ما فكيت القطب..

كثير رواق الوضع..

بس انا موجوعة ومسهلة معدتي وضهري عم يوجعني.. عتلانة هم الجايي..

الله يستر و ييسر.. حاسة اخلاقي صايرة ما منيحة لأن ما عم اقدر استحمل اي ضجة..

كثير مبسوطة اني عم رضع الله يديمها نعمة ويبعت لجميل رزقته..

بس بعد متمناية انزل شي ١٠ كيلو 🙈 

١١ أب ٢٠١٥

نهار ماراثوني غريب عجيب..

الاثنين المساء حسيت بمغصة قوية ما قدرت نام من بعدها.. ضليت كل الليل موجوعة بس ما بدي انزل عالمستشفى لأن فاطمة بتجي الثلاثاء.

صبرت على وجعي للثلاثاء واجت فاطمة ساوت البيت وهي عندي نزل دم وزاد وجعي وطلعت عم اطلق والساعة ٧:١٠ خلق ابني جميل.

هالمرة ما صار مشاكل.. ماما كانت عم تجي الساعة ٧:٣٠ لل ٩

حماتي بتمرق ساعتين بالنهار

خيي بيطل بالليل

وعم قضي كل النهار مع زوجي.

اليوم الخميس، فادي زهقان.. بده بضهر من المستشفى بس ما في موظفين بمكتب الاستقبال

وكرمال هيك طلع عالشقة يسقي الزرع لأنه زهقان.

وحالياً انا وحدي بالمستشفى.

الحمدلله.. كل مرة تجربة جديدة..

هالمرة الوجع جسدي بقوة اكثر من انه نفسي..

الحمدلله على كل شيء

بزعل وقت...

بزعل وقت بلاقيه اشترى لإمه فرن ب ٨٥٠$ وبطلب من كومود للغرفة ب ٣٠٠$ بيقعد بيحسب مية حساب وبيحسسني انه المصاري الي...

بزعل وقت بلاقيه بيغيب عن شغله كرمال امه واذا انا طلبت ياخد البنات معي عند الحكيم لأني بشهري وما قادرة لحالي بيقلي صعبة غيب عن شغلي بيصير المال حرام...

بزعل وقت بلاقيه بيحكي ويساير العالم، وبيقول لرفيقه انتبه على مرتك صارت بشهرها وانا عم موت وجع وتعب قدّامه وعادي..

بزعل وقت يلي بيخانقني ليه ما عم جيب خادمة وانا عارفة انه ما قدرته وعم حاول خفف عليه..

بزعل وقت كان تتطلع المبادرات منه وهلق ناسيني...

بزعل وقت يوعدني يضهرني قبل ما ولد وبيأجلها لمية سبب...

بزعل وبخلي بقلبي لأن الشكوى لغير الله مذلة 😭 

قرررربت

صرت بالشهر التاسع، ولي العهد ممكن يجي بأي لحظة..

حاسة بتعب وإرهاق قوي وما عم نام الليل..

كان الحمل الماضي اسهل بكثير.. حتى زوجي كان يساعدني اكثر بالبيت..هلق الحمل عليي، وجعني ضهري من ضب الأغراض عن الارض..

صحيح بيقلي جيبي خادمة، بس من وين بدي جيبها والمعاش ما بيضاين لآخر الشهر..

اشتهيت الدراق اسبوع وما معي حقه، لحد ما اكلته عند اهلي، حتى بابا قلي "صحتيييين" وقت شافني عم أكله كأن كان واضح قديش على بالي منه 🙈

 مبارح بعتت مسج لزوجي عم قله انه حابة تجربة الولادة هالمرة تكون حلوة وما يصير مشاكل.. ب رد عليي انا وأهلي ما منعمل مشاكل..

كلامه قاسي أحياناً سكتت وما رديت بس فتت على قوضتي وبكيت ..

كان على اساس اليوم البنات عندهم حكيم الساعة ١٠ خانقني كيف باخد الموعد بهالوقت لأن عنده شغل، غيرت الموعد لنهار الخميس حتى روح لحالي وبلا ما ازعج حدا.. وإذ اليوم بيطلع مع أمه على الشقة وما بروح على شغله قبل الساعة ١...

سبحان الله بس لإلي بيصير عم اكل مال حرام، مع ان الموعد لبناته مش ل إلي... 

وبكرا كان واعدني نضهر قبل ما ولد، بس ما ح يوفي بوعده لأن بده ياخد امه على طرابلس.. وانا اكيد مزروبة بالبيت لأن رايح بسيارتي....

الحمدلله، رغم كل شي بيضل احسن رجال بنظري .. وبحبه وبموت في..

بس ......

كبرت البنوت

صار التوأم عمرهن سنتين، وصاروا يعبروا بطلاقة، بيغنوا بيرقصوا بيلعبوا...

بعد شهر ح يجيني اخ لإلهن، المسؤولية عم تكبر وصرنا عيلة بكل ما للكلمة من معنى..

خيفانة ومبسوطة..

الروتين بعده وعم يزيد..

زوجي بعده بحبني ويومياً بقلي ياها بس ....

هو اكيد عم يشيل عني حمل كبير بتربية الأولاد ، وبوجوده ما بحاجة اعمل شي، بيطعميهن، يلعبهن، بنيمهن وبروح بآخر الليل نايم معهن....

وانا مثل عادتي بغفى عالكنباية وحيدة..

وقت خبره اني مشتاقة لكثير قصص بجوابني ببساطة بس انا عم ساعدك بالأولاد..

كان كل عيد يفوت عليي بهدية، هلق بقلي روحي اشتري شي

على عيد ميلادي بيعطيني مصاري وبيقلي اشتري هدية

وقت قول خلصت الريحة بقلي جيبي غيرها، بينما قبل كان يلاحظ انها قربت تفضى ويجيب قبل ما احكي

عم يتعب بالشغل وبالبيت، بس انا ما بقى حاسة الي كيان..

بطلع على حالي بالمراية بلاقي انسانة ميتة، بلا لون او روح..

عبالي عيش من جديد وترجعلي الحياة والبسمة...

عبالي حتى يهتم فيي الي..

عبالي نام على صدر زوجي وأنسى تعبي