عيد ميلادي

٢٩ سنة...

يمكن على قد ما بحب حدا يعملي عيد ميلاد ومفاجأت وافتح هدايا و و و... على قد ما ولا شي بيتحقق

قال المنحوس منحوس لو ركبوله فانوس..

واخيراً بعد ٥ سنين قرر زوجي يعملي قالب جاتوه مخصص الي..

مع اني اكيد كنت بتمنى فكرة مهضومة انه شي مع الاولاد او هيك، بس حبيت انه بيعرف اني بحب التوليب الموڤ اختار هيدا ل theme..

قرر يحتفل بعيد ميلادي عند حماتي نهار السبت..

قبل الظهر كنت عند بابا بالمستشفى ومع البنات بالحلقة 

رجعنا الظهر كانت حماتي عاملة سمك عالغدا.. تغدينا الساعة ٢:٣٠ والساعة ٣ انقطعت الكهربا

 

زوجي كان بده يفل بكير كرمال يطلعها عخلدة فجاب قالب الكاتوه مباشرة بعد الغدا..

تخايل المنظر صار القالب قدامي، فرحت فيه ، جيت بدي صوره لأن اول مرة حدا بيعملي شي الي

قام حماتي بتقله رجعه ما جوعانين 😳

اي اي فيكن تتخايلوا بخعتي

واكيد الاولاد بعد ما شافوا القالب صاروا ينقوا بدهم ياكلوا وبلا ما نحس راحت نور عالمطبخ وعم تسحب القالب من البراد راحت قالبته وخفس..

عادي

اصلاً جداً عادي

كوميديا..

ما مكتوب لي بحياتي حس بأهمية او افرح بهالنهار..

اصلاً اليوم عيد ميلادي وقاعدة لحالي وعادي ..

زهق مثل اي يوم..

 عبالي ابكي 😭😭😭

التكرار

اذا في يوم حبيت ورجعت صغير

وقلبك قبل ما يعلن غرامه طار

اذا مالك جناح اصنع جناحك وطير

واذا ما انت شاعر اسرق الشعّار

وعيش الحب كأنه حبه الاخير

تمسك بأمنياتك لو تكون كثار

ترى عمر المحبة لو يطول قصير

وليالي الحب لو طالت تضل قصار

واذا اجمل شي بالدنيا هو تغيير

ترى أسوأ شيء بالدنيا هو تكرار

نكبر

نكبر ويتغير كل شيء في عيوننا 

نصبح أكثر إدراكاً لقيمة الأشياء حولنا 

جلسة عائلية .. جلسة مع الأصدقاء 

صوت والديك في المنزل 

دموعنا وضحكاتنا تصبح أكثر صدقاً

نندم على لحظات لم نعشها كما يجب .. نتمنى أن تعود 

يغلب واقعنا على خيالنا 

نتمسك بالأمور الجميلة من حولنا ونخاف خسرانها 

ندرك كم أخطأنا، كم فاتتنا أمور كثيرة 

ننظر خلفنا ونشعر بكرم رب العالمين وحسن اختياره لنا 

كم بكينا وجبر خواطرنا 

كم دعونا واستجاب 

كم تمنينا ولم يستجب فكان خيراً لنا 

فنعيش موقنين أن ما سيختاره الله هو الخير 

فنرضى ..

وأكثر من حالي

بتعرفوا شعور وقت تحب حدا اكثر من حالك..

وقت يكون فرحه وحزنه وراحته هو الأساس 

وقت تنسي نفسك كرماله..

هيدا مش بس حب هيدا اكثر من هيك بكثير..

والله انه انا غرقانة بأحلى نعم بالدنيا..

زوجي واولادي

الله يحميلي اياهم ويخليلي اياهم

اللهم لا تريني بهم بأساً

وأخيراً

عملها وأخيراً وجبلي شي كان عبالي

عنجد حاسة بسعادة كبيرة

عوينات صرلي٦ اشهر بطلع على واجهات المحلات عليه وأخيرا جبلي اياه بلا نا اطلب

حاسة بسعادة مثل طفل جابوله أهله ثياب عيد

احلام نرسمها

هو لي.. لكن ذهب.. في كل أمور حياتنا نحلم بأشياء و منها نرسم زهورا و أحيانا لا ننام و نحن نتحضّر لتلك اللحظات لكن ببساطة و أمام أعيننا تذهب لغيرنا.. لسبب واحد ان ليس فيها خير لنا و لو كان فيها خير حتماً ستعود.. علينا أن نتأقلم على فقدان أحلامنا أحياناً لأن ما معنا قد يكون حلم غيرنا.. على الأقل نتعايش مع فقدان ما نريد الى ان يأتي ببساطة هو نفسه او خير منه.. كم اتمنى ان انام سريعاً من غير تخطيط و احلام تجعلني افكر و ارتب و أهندس و أبتسم من دون ان اشعر.. كم اتمنى ان لا احلم بما اريد و كم اتمنى ان لا اريد شيئ.. 

كبرت يا امي

ﻛﺒﺮﺕ ﻳﺎ ﺃُﻣﻲ .. ﻭﺻﺮﺕ ﺃُﺷﺒﻬﻚ ﺍﻛﺜﺮ ..

ﺻﺮﺕ ﺃﺳﺘﻴﻘﻆ ﺑﺎﻛﺮﺍ ..

ﻭﺻﺮﺕ ﺃﻧﺎﻡ ﻗﺒﻠﻬﻢ ..

ﺻﺎﺭ ﺍﻟﺰﺣﺎﻡ ﻳﺨﻨﻘﻨﻲ ..

ﺻﺎﺭ ﺍﻟﻜﻼﻡ ﻳﺮﻫﻘﻨﻲ ..

ﻛﺒﺮﺕ ﻳﺎ ﺃﻣﻲ ﻭﺻﺮﺕ ﺍﺳﺘﻄﻌﻢ ﺍﻟﺸﺎﻱ ﺍﻛﺜﺮ ..

ﺻﺮﺕ ﺃﺣﺐ ﺍﻷﻋﺸﺎﺏ .. ﻭﺭﺍﺋﺤﺔ ﺍﻟﻌﻨﺒﺮ ..

ﻛﺒﺮﺕ ﻳﺎ ﺃﻣﻲ ﻭﺻﺮﺕ ﺃﻗﺮﺃ ﻛﻞ ﺷﻲﺀ ﻭﺣﺪﻱ ..

ﺃﺑﻜﻲ ﺑﺼﻤﺖ ﻭﺣﺪﻱ .. ﻭﺍﺷﺘﺎﻕ ﻭﺣﺪﻱ ﻟﻮﺣﺪﻱ ..

ﻛﺒﺮﺕ ﻳﺎ ﺃﻣﻲ ﻭﺻﺎﺭ ﺍﻟﺠﻤﻴﻊ ﻳﺮﺣﻠﻮﻥ .

ﺻﺎﺭ ﺃﺻﺪﻗﺎﺋﻲ ﺍﻗﻞ ﺑﻜﺜﻴﺮ ..

ﺻﺮﺕ ﺃﺣﺐ ﺍﻟﻬﺪﻭﺀ ﺗﺨﻴﻠﻲ .. 

ﻭﻳﺘﻌﺒﻨﻲ ﺍﻟﺼﺨﺐ ﺟﺪﺍ ..

ﻛﺒﺮﺕ ﻳﺎ ﺃﻣﻲ ﻭﺻﺎﺭ ﻻ ﻳﻬﻤﻨﻲ ﺍﻟﺴﻬﺮ .. 

ﺻﺎﺭ ﻳﺮﻳﺤﻨﻲ ﻣﺜﻠﻚ ﺍﻟﺒﺤﺮ ..

ﻣﺎ ﻋﺪﺕ ﺗﻠﻚ ﺍﻟﺘﻲ ﺗﻨﺎﻡ ﻟﺘﺤﻠﻢ ﺑﺬﻟﻚ ﺍﻟﻔﺴﺘﺎﻥ ..

ﺻﺎﺭ ﺍﻟﻌﺎﻟﻢ ﻳﺎ ﺃﻣﻲ ﻣﻌﻘﺪ .. 

ﻭﺍﻟﺒﺴﺎﻃﺔ ﺍﺻﻌﺐ ﻭﺃﺟﻠﺪ ...

ﺻﺎﺭ ﺍﻟﻜﻞ ﻛﺎﻟﺪﻣﻰ .. ﻭﻣﺎ ﻋﺪﺕ ﺃﻋﺮﻑ ﺃﻟﻌﺐ ..

ﺻﺎﺭﺕ ﺍﻟﺤﻴﺎﺓ ﻻ ﺗﺸﺒﻪ ﻣﺎ ﻗﻠﺖِ .. ﺑﺎﻟﻜﺎﺩ ﻣﻠﻮﻧﻪ ..

ﺻﺎﺭ ﺍﻟﺸﺎﺭﻉ ﻓﻲ ﺍﻟﻐﺎﻟﺐ " ﻣﺰﺣﻮﻡ " .. 

ﻭﺍﻟﻜﻞ ﻳﺎ ﺃﻣﻲ ﻣﻬﻤﻮﻡ ..

ﺻﺮﺕ ﻳﺎ ﺃﻣﻲ ﺍﺷﺘﺎﻕ ﻟﻲ ﺍﻛﺜﺮ ..

ﺍﺷﺘﺎﻕ ﺃﻧﺎ ﺍﻟـ " ﺻﻐﻴﺮﺓ " ﺗﻠﻚ ..

ﺍﺷﺘﺎﻕ ﺗﻮﺑﻴﺨﻚ ﺍﻟﻌﻔﻮﻱ ﺍﻟﺼﺎﺩﻕ ﺍﻟﻠﻴﻦ ﺍﻟﻤﺒﻜﻲ ..

ﺻﺎﺭﺕ ﺍﻟﺤﻴﺎﺓ ﻳﺎ ﺃﻣﻲ ﺗﻮﺑﺨﻨﻲ ..

ﺍﻷﻳﺎﻡ ﺑﻼ ﻋﺪﻝٍ ﺗﻌﺎﺗﺒﻨﻲ ..

ﺻﺎﺭ ﺍﻟﻜﻞ ﻳﻠﻮﻡ .. ﻣﻦ ﻗﺮﻳﺐ .. ﻣﻦ ﺑﻌﻴﺪ .. ﻭﺍﻟﻌﻤﻮﻡ ..

ﻏﺎﺏ ﺍﻟﺤﺐ ﺑﻼ ﻣﺼﻠﺤﺔ ..

ﻭﺻﺎﺭ ﺍﻟﺼﻠﺢ ﻣﺠﺎﻣﻠﺔ ﻣﻜﻠﻔﺔ ..

ﻛﺒﺮﺕ ﻳﺎ ﺃﻣﻲ ﻭﻭﺟﺪﺕ ﺍﻟﻴﻮﻡ " ﺷﻴﺐ "

ﻗﺪ ﻧﺎﻝ ﻣﻦ ﺷﻌﺮﻱ ﺍﻟﺪﺍﻛﻦ ﺍﻟﺬﻱ ﺗﺤﺒﻴﻦ ..

ﺍﻟﺬﻱ ﻛﻨﺖ ﻓﻲ ﺍﻻﻣﺲ ﺍﻟﺒﻌﻴﺪ ﺑﻪ ﺗﻐﻨﻴﻦ ﻭﺗﻠﻌﺒﻴﻦ

ﻛﺒﺮﺕ ﺟﺪﺍ .. .. ﻓﻠﻢ ﻳﻌﺪ ﺍﻟﻌﺎﻟﻢ ﻫﺬﺍ ﻣﺸﻮﻕ ﻛﻤﺎ ﻇﻨﻨﺖ ..

ﻛﺒﺮﺕ ﻳﺎ ﺃﻣﻲ ﻷﻋﺮﻑ ﺃﻧﻨﻲ ﻻ ﺯﻟﺖ ﺻﻐﻴﺮﺗﻚ ﻣﻬﻤﺎ ﻛﺒﺮﺕ ﻭﺃﻥ ﺣﻀﻨﻚ ﺃﻧﺖِ ﻻﺯﺍﻝ ﻋﺎﻟﻤﻲ ...

ما كل ما يتمناه المرء يدركه

هيي الدنيا أطباع 

بس كمان النفوس الها مفتاح...

بنطره يعجبه شي لجبله اياه، بحاول فتش شو ناقصه لأمنه ..

بنفس الوقت بلمح قدّامه هالشي حلو.. هالكنزة حلوة، هالريحة حلوة ولا كأنه قلت شي..

بزعل كيف بفكر بكل يلي حواليه وب يلي ناقصه وبيحاول يسعد الكل..

بس انا لا..

بيكتفي يعطيني مصروفي الشهري وجيبي يلي بدك ياه

والله قال النبي تهادوا تحابوا... 

هو تفكيره خدي وجيبي، بس انا بحب الهدية 🙈🙈

لك قديش كنت ما حب الورد هلق بشتهي وردة 

ضليت شهرين قول شو حلو التوليب 🌷 بس ما عم توصل الرسالة وانقطع التوليب من السوق 😂😂

يلا راحت لسنة الجايي لنرجع نلطش عالتوليب بركي الرسالة بتوصل هالمرة 😁

لا يغير الله ما بقوم حتى يغيروا ما بأنفسهم

من اسبوعين وصلت لقمة الكآبة والإحساس بالعجز

تعبت من الاولاد، عصب ايدي عم يموت وجع ظهر وغيرها..

فادي حس عليي وقرر ياخدني عمرة قلت له ياخد الحجة معنا بس هيي كانت حابة تروح نادين

وهيك صار قلتله ياخد أخواته والله بيعوض..

مشينا الخميس الصبح عالمدينة المنورة..

الحملة ما شاء الله عليهم عنجد كثير مرتبة وخدومين

المدينة ولا اروع.. سكينة وراحة.. بتنسى همك فيها

دخلنا الخميس عالروضة.. تانت صلت بس نادين وناريمان لا..ضاجوا من العجقة

وحدة من نسوان الحملة معها طفل زغير تركتلي اياه لإحمله قد ما تلبكت فيه..

كنت فوت الصبح والليل عالروضة، كل الصلوات بالحرم.. ما ضيعت ابداً وقت بالمدينة، أغلب وقتي كان بالحرم.

مشينا الاحد على مكة.. وصلنا الساعة ٧ بالليل وعملنا العمرة الساعة ١٠..

عملت أربع عمرات كلها ميسرة ولا اروع

كنت أزعل من فادي كنت متوقعة اهتمام اكثر..

بعدها صورة الشب والبنت يلي ماسكين ايدين بعض بالمصعد، وماشي وعابطها بالحرم خايف حدا يقرب لها ببالي.. كنت احلم بهالرومنسية

بس كان ضايع بيني وبين أهله وما بده يقصر مع حدا..

حاولت ما ازعجه كنت قله بالباص قوم اقعد حد أمك..

باب غرفتي بالمدينة فتحتها عليهن حتى ما يحسوا أنهن لحالهن رغم انه بطل في خصوصية الي..

بالروضة كنت اكل انا ضرب بضهري مقابل أنهن يصلوا براحة..

مرة حماتي نسيت حذائها بالروضة رجعت وجبتلها اياه حتى ما تتعذب..

كنت دائماً اركض جبلها كرسي و زمزم لتشرب ..

حاولت اعمل أقصى جهدي لاكسب رضى زوجي..

بمكة الاوتيل كان كثير حلو، والترويقة كثير مرتبة..

بالعمرة الثانية وحدة ضربتني وخلعتلي كتفي.. متت وجع وعالتعب والمشي كان ح يبطل الي صلاة..

وركبتي كانت كثير توجعني، حاولت اخفي وجعي .. ووقت يلي بدها تنزل عالسوق نزلها ، حاولت ما قصر مع حدا.. بس ما بعرف...

اخر نهار نزعتها، تخانقنا شوي.. كان على اساس نعمل عمرة عن النبي (ص) والسيدة عائشة بس هيي ما قبلت كان بدها عن ناريمان مع انه ما عليها حساب..

قلتلها اتركينا نعمل عنهم وناريمان تعمل عن حالها وانا بجرها بالعرباية ما كانت تقبل.. هون انا زعلت

واصلاً انا بزعل دغري وببين عليي بقى كيف مع حبوب منع الحمل اكيد صورخ الزعل عندي..

المزعج بفادي انه ما بيراضيني.. من اول ما تعرفت عليه وهو هيك..

يمكن لو اخدني وقللي المرة الجايي منعمل وحكاني كلمتين حلوين دغري بروق بس هو مثل العادة سياسة فرض الامر الواقع ...

 

ومثل العادة دائماً بكسر على نفسي وجئت وصالحته

وبعد ما رجعنا من المطار كان بابا جايي ياخدنا عتبت عليه انه ما وقف وحكي معه

وبالسيارة جرحني كثير بالحكي .. قلتله رجعنا ورجع القرف قام رد القرف كان لاحقين لهونيك..

بكلمة بيلغي كل شي عملته..

بكلمة بيجرحني وما بيسأل

مش عم امدح بحالي بس عنجد ما مقصرة معه..

عملت أقصى جهدي بس.........

الحمدلله على كل حال